Lindemann: Jemi përgatitur për të fituar

Prishtina që iu kthye fitores xhiron e shkuar duket të jetë e përgatitur edhe për një fitore.

Së paku kështu mendon trajneri gjerman i saj, Lutz Lindemann. Në një prononcim për faqen zyrtare të ekipit ai ka thënë se përkundër se Drita është ekip i fortë, Prishtina udhëton për fitore.

“Të gjitha ndeshjet ku fitohet pikë, janë të rëndësishme. Ne e kemi parë se kur kemi ditë të mirë mund të mposhtim çdo kundërshtar, por edhe kur nuk jemi në ditën tonë, munden edhe kundërshtarët të na mposhtin. Në përballemi me një ekip të fortë siç është Drita ku pozita e tyre në tabelë nuk është reale dhe jemi përgatitur maksimalisht gjatë javës për ta fituar,” ka thënë Lindemann.

Prishtina udhëton në Gjilan nesër për tu ndeshur me Dritën e Ismet Munishit, që po kërkon fitoren e parë me ekipin e tij, pasi që mori drejtimin e skuadrës një xhiro më parë dhe debutoi me barazim ndaj Drenicës në Skenderaj.