QARABAG 2-0 PARTIZANI
Me eliminimin e Partizanit, s’mbetet asnjë ekip shqiptar në Ligë të Kampionëve
18 July, 2019 @10:49
Pas eliminimit të Feronikelit, Shkëndijës në raundin e parë kualifikues të Ligës së Kampionëve, mbrëmë me humbje 2-0 nga Qarabagu, edhe Partizani i Tiranës është përshëndetur nga kjo garë.
Partizani kishte barazuar në ndeshjen e parë 0-0, ndërsa në atë të kthimit dje duroi vetëm në pjesë të parë. Në pjesë të dytë së pari kroati Filip Ozobic (51’) shënoi për avantazhin e ekipit nga Azerbajxhani e më pas në fund të ndeshjes ka qenë spanjolli Dani Quintana (90’) që përfundoi dilemën e kualifikimit me 2-0.
E mira e garave të UEFA-së është që të eliminuar nga raundet kualifikuese të Ligës së Kampionëve fitojnë rast të vazhdojnë aventurën evropiane në Europa Ligë dhe tashmë të gjitha skuadrat i dinë kundërshtarët e tyre në raundin e dytë kualifikues të Europa Ligës.
Kështu: Feronikeli do të luajë ndaj Slovanit të Bratisllavës. Shkëndija do të ndeshet me Dudelangen e Luksemburgut, ndërsa Partizani i Tiranës do të ketë punë me Sheriffin e Tiraspolit molldav.
Pra të tre kampionët shqiptarë, të Kosovës, Shqipërisë e Maqedonisë Veriore - nuk kanë arritur të bëjnë më shumë sesa raundi i parë kualifikues i garës më elitë në Evropë.