Me përvojë në mbrojtje, Arbëria siguron portën

Dy mbrojtësit me përvojë të Superligës, Labinot Ibrahimi që ka bërë karrierë edhe në Superiore ndër vite, si dhe Fidan Gërbeshi, që ka qenë pjesë e Dritës së fundi — janë dy nënshkrimet e Arbërisë që sigurojnë mbrojtjen e ekipit për sezonin 2021/22.

Arbëria ka debutuar në stinorin e kaluar në Superligë, ndërsa nuk ka arritur të mbijetojë aty, edhe pse kishte një start shumë të mirë, veçanërisht në 7 xhirot e para.

Ibrahimi 35-vjeçar që erdhi në stinorin e kaluar te Arbëria, do të vazhdojë edhe një stinor me klubin kuqezi nga Dobraja e Lipjanit. Ai mund të luaj thuajse në të gjitha pozitat e mbrojtjes, duke pasur parasysh se ka qenë edhe mbrojtës krahu në kohën e tij më të mirë kur ishte te Partizani i Tiranës.

Në anën tjetër, Gërbeshi 36-vjeçar ka përvojë të madhe në Superligë, por edhe tituj të fituar. Ai ka qenë pjesë e Feronikelit dhe Dritës dhe me të dyja skuadrat ka fituar trofe në Kosovë, ndërsa te gjilanasit ka qenë edhe shutues i rregullt i penalltive — që jep siguri shtesë për Arbërinë sa i përket mundësive nga 11-metërshi.

Arbëria tash do të garojë në Ligën e Parë B të Kosovës, ndërsa pas shortit të tërhequr sot për sezonin e radhës, ata do të hapin stinorin ndaj Flamurtarit të Prishtinës, që mund të konsiderohet derbi i xhiros së parë në këtë grup të Ligës së Parë.