Meksika me penallti në vazhdime siguron finalen

Pas përfundimit të kohës së rregullt pa gola dhe me sulme të Haitit, Meksika ka shënuar fitore në vazhdime në gjysmëfinale të Gold Cup (ekuivalent i Copa America dhe Kampionatit Evropian, për shtetet e Amerikës së Mesme dhe Veriore) 1-0.

Golin nga penalltia e shënoi Raul Jimenez, duke e shënuar të pestin gol personal në Gold Cup 2019.

Gjatë ndeshjes Meksika nuk tregoi lojë të mirë dhe shumë herë u rrezikua nga Haiti (i 101-të në renditjen e FIFA-së), por në fund meksikanët triumfuan për të siguruar finalen e parë që prej vitit 2015.

Në finale, sombrerot do të ndeshen me fituesin e gjysmëfinales Xhamajka - SHBA që luhet në mëngjes heret më 4 korrik (03:30). E finalja do të luhet më 8 korrik (03:00).

Fitues i fundit i Gold Cup të zonës Concacaf të FIFA-së është SHBA-ja, që kishte fituar Xhamajkën në finalen e vitit 2017.