Messi, i gatshëm 100%

Lionel Messi është kthyer. Pas lëndimit që e morri në ndeshje me Paris St Germainin në çerekfinale të Ligës së Kampionëve, sulmuesi argjentias i Barcelonës do të jetë plotësisht i gatshëm për ndeshjen e parë gjysmëfinale në Allianz Arena të Munchenit. 

Kështu ka njoftuar sot drejtori sportiv i skuadrës katalonase, Andoni Zubizarreta, që si lojtar ka kryer detyrën e portierit në Barcelonë dhe në përfaqësuesen spanjolle. 

“Messi është me ekipin bashkë dhe është në gjendje shumë të mirë për ndeshjen e nesërme,” ka thënë Zubizareta për faqen zyrtare të klubit katalonas. 

Bayern Munchen do të ndeshet me Barcelonën në kuadër të gjysmëfinaleve të Ligës së Kampionëve, ndërsa në gjysmëfinalen tjetër takohen Borussia Dortmund dhe Real Madrid.