SUPERCOPPA

Napoli triumfon në dramë, fiton Superkupën

22 December, 2014 @22:16

Napoli ka triumfuar në ndeshjen e vlefshme për Superkupën e Italisë, të zhvilluar sonte në Doha të Katarit.

Ekipi i Rafa Benitezit, Napoli, ka marrë trofeun e dytë në drejtim të tij, duke e mposhtur kampionin e trefishtë të fundit të Italisë - Juventusin, duke e mposhtur pas penalltive.

Raste të shumta, gola, shtylla dhe kartonë të verdhë - përplotë, derisa ndeshja nuk u zgjodhi fituesin pas 90, e as pas 120 minutave lojë.

Sulmuesit argjentinas të të dy skuadrave ishin në formë sonte. Carlos Tevez i jepte epërsinë Juventusit, derisa Gonzalo Higuain barazonte për Napolin.

Kështu shkoi edhe në vazhdime, Tevez shënoi për avancim të Bianconerëve 2-1, por Higuain përsëri barazoi 2-2 dhe fati i ndeshjes duhej të zgjidhej pas penalltive.

Numri një i botës në portë, Gianluigi Buffon, tregoi edhe njëherë cilësitë e tij duke mbrojtur tre penallti - por këtë nuk e shfrytëzuan lojtarët e ekipit duke dështuar të shënojnë.

Në anën tjetër edhe portieri brazilian i Napolit, Rafael Cabral nuk mbeti duarbosh, duke e mbrojtur penalltinë vendimtare të shutuar nga Simone Padoin.

Ky ka qenë triumfi i dytë i Napolit në Superkupë, derisa të parën e kishin fituar në kohën e të madhit, Diego Maradona (1990).