Ndeshja e sezonit, përmbysje e madhe e Cityt!

Ashtu siç edhe pritej, një ndeshje fenomenale u zhvillua sonte në ‘Etihad Stadium’. Ishim dëshmitarë të një prej ndeshjeve më të bukura të viteve të fundit në futboll!

Dy nga skuadrat me sulmet më të shpejta në botë, Manchester City dhe Monaco, zhvilluan një takim tepër interesant dhe emocionues, me sulme nga të dyja anët, për të dhuruar një super natë me futboll për të gjithë shikuesit.

20 minutat e pjesës së parë dhuruan futboll të shpejt nga të dyja anët, ndërsa rasti i parë për shënim ishte për Sergio Agueron në minutën e 24’ të takimit. Argjentinasi nuk arriti ta prekte topin nga një distancë shumë e vogël dhe City nuk e gjeti golin nga ky rast. Pak minuta më vonë, pas një super solo-akcioni të gjermanit Sane, më së miri në zonë u gjend Raheem Sterling, i cili shënoi për 1-0, në një akcion shumë të kontestueshëm për pozicion jashtë loje.

Gjithsesi, barazimi i Monacos erdhi shumë shpejt, me kolumbianin Falcao që shënoi me kokë, rast i cili u mundësua nga degazhimi katastrofal i portierit Caballero. Pas pak minutash, një tjetër rast i kontestueshëm ndodhi. Sergio Aguero u rrëzua në zonë nga portieri mysafir, mirëpo gjyqtari kryesor hezitoi të jepte penallti për Cityn. Përkundrazi, ishte Aguero ai që u ndëshkua me karton të verdhë për shkak të simulimit, edhe pse në përsëritje shihej që një kontakt sado i vogël kishte ekzistuar.

Kjo nuk ishte e tëra për pjesën e parë. Pas një super asistimi nga Sidibe, një vrapim pas mbrojtjes i super-talentit 18-vjeçar Kylian Mbappe, bëri që City të ndodhet në disavantazh pas 45 minutave. Mbappe nuk gaboi para Caballeros dhe i dhuroi francezëve epërsinë 1-2, rezultat me të cilin u mbyll pjesa e parë.

E pjesa e dytë ishte edhe më e bukur se e para. Gjithçka filloi me një penallti të shpërdoruar nga Falcao me të filluar pjesa e dytë, penallti e cila u rikthye ‘boomerang’ në anën tjetër, me Sergio Agueron që shënoi për 2-2 falë një gabimi katastrofal të portierit Subasic. Mirëpo, Monaco përsëri e gjeti golin. Në skenë ishte përsëri Radamel Falcao, i cili shënoi një supergol për 2-3.

Kur menduam se Monaco do të kthehej në Francë me epërsi dhe City ishte pranë eliminimit, anglezët u rikthyen në lojë fuqishëm! Të ndihmuar edhe nga një mbrojtje tmerrësisht e dobët e Monacos, ‘qytetarët’ e gjetën edhe 3 herë golin. 2 gola u realizuan pas goditjeve nga këndi, kurse një tjetër nga Leroy Sane, për ta mbyllur kështu ndeshjen me fitore 5-3 dhe për të shkuar me epërsi 2 golëshe në ndeshjen e kthimit në Francë.

Me bindje mund të themi që kjo ishte një nga ndeshjet më të bukura që kemi parë në futbollin europian viteve të fundit dhe shpresojmë që ndeshje të tilla të shohim sa më shpesh!

All Goals & highlights HD - Manchester City 5-3… by footballderby