Ndeshje të mëdha para Vitit të Ri

Sulmuesi uruguajan i Liverpoolit, Luis Suarez, beson se periudha para Vitit të Ri mund të përcaktojë a është Liverpooli në garë për titull apo jo. 

Ekipi i udhëhequr nga uellsiani Brendan Rodgers, është vetëm dy pikë larg liderit Arsenal, ndërsa nëse arrijnë fitore të shtunën ata do të mund të dalin në vendin e parë të tabelës të shtunën. 

Mirëpo, Suarez që ka shënuar 17 gola në 11 ndeshje kampionale beson se dy ndeshjet para Vitit të Ri, do të jenë përcaktuese për të qenë apo jo në luftë për titull. 

“Mendoj se është heret të parashikohet tani. Nëse vazhdojmë të luajmë në këtë nivel edhe në dy javët e ardhshme atëherë besoj se mund të thuhet që jemi në luftë për titull. Duhet të koncentrohemi për dy ndeshje të mëdha pas Cardiffit, shumë të mëdha,” ka bërë të ditur Suarez, transmetojnë mediat angleze sot. 

Liverpool, pas Cardiff Cityt do të ketë dy ndeshje tepër të vështira. Më 26 dhjetor udhëtojnë në Manchester për tu ndeshur me Cityn, derisa tre ditë më vonë udhëtojnë në Londër për tu takuar me Chelsean.