Nuk më duan në kombëtare!

Kristi Vangjeli, një kohë, mbrojtësi premtues dhe i pazëvendësueshëm i kombëtares shqiptare. Tash, as që ftohet. Krejt kësaj i parapriu një lëndim i mbrojtësit në skuadrën ku luan, Chernomorets të Odesës në Ukrainë. 

Mirëpo, ai tashmë është 100% i gatshëm ka shprehur mllefin ndaj disave që s’po e thërrasin në profilin e tij zyrtar në Facebook. 

“Thirrja ime në kombëtare është bërë si ajo puna e barcoletës, “Çfarë uji i ke dhënë gomarit”. Në fillim më thonin se duhet të aktivizohesh, për të qenë pjesë e kombëtares. Tani që aktivizohem, nuk thirrem. Kur them se i kam dhënë gomarit ujë të ftohtë, ata më thonë se është dashur i nxehti dhe e kundërta,” ka marrë shembull Vangjeli rastin e tij me kombëtaren. 

“I sqaroj opinionit sportiv se Kristi Vangjeli ka dhënë maksimumin për fanellë të kombëtares. I ka tifozat në zemër dhe askush s’ma ndal mua dashurinë për kombëtaren. Lëndimi im ka kaluar plotësisht dhe jam në formacionin startues të ekipit tim çdo javë këtu në Ukrainë, jam 100% gati, por dikush nuk do që të jem pjesë e kuqezinjëve,” ka shkruar ai në profilin e tij zyrtar. 

Shqipëria më datën 7 qershor ndeshet me Norvegjinë në Tiranë, në ndeshjen që pritet jetë-a-vdekje për kombëtaren, pasi që në rast fitoreje gjasat për kualifikim në Kampionatin Botëror për herë të parë do të shtoheshin mjaft.