Nuk u ndihmua sulmuesi

Trajneri i Prishtinës, Mirel Josa, përkundër barazimit me Vëllaznimin sot dhe mundësisë së humbjes së kreut të klasifikimit, ka thënë se skuadra e tij është në rrugë të drejtë dhe kampionati nuk mbaron këtu.

Ai ka bërë të ditur se ekipi i tij duhet të ishte më cinik në sulm sa i përket shfrytëzimit të pak rasteve, por edhe sulmuesi nuk u ndihmua mjaft nga mesfushorët.

“Prishtina ishte me pak raste, por problemi nuk qëndron këtu, por në momentet e atyre rasteve ne duhej të tregoheshim më cinik në kuptimin e shfrytëzimit të tyre. Por, as këtu nuk është problemi, por duhej të vinim në ndihmë të Januzit në pjesën e parë i cili ishte i vetëm dhe duhej t’i ndihmohej qoftë nga dy krahët, qoftë nga dy mesfushorët e qendrës, gjë që nuk u bë ashtu siç duhet. Vëllaznimi na sulmoi energjikisht në pjesën e parë në disa momente e në pjesën e dytë u munduam të ndryshojmë duke prishur rreshtimin fillestar të skuadrës duke vendosur dy sulmues përpara, por ku duheshin treguar më të qartë gjatë lëvizjes së tyre. Megjithatë unë them se skuadra është në rrugë të drejtë, sepse kampionati nuk mbaron me një ndeshje apo dy ndeshje siç mund të mendojnë disa, sepse është kampionat i gjatë dhe të gjitha ndeshjet do të jenë të vështira,” ka thënë Josa pas ndeshjes, shkruan faqja zyrtare e Prishtinës, prishtinafc.com.

Prishtina është aktualisht lidere e Superligës me dy pikë më shumë se Llapi që luan nesër derbin ndaj Dritës.

Bardhekaltërit lidershipin e morrën xhiron e kaluar kur mposhtën liderin e deri-atëhershëm, Llapin.

Xhiron që vjen, Prishtina ka punë me kampionin aktual të Superligës, Trepça’89. Këta të fundit kanë nisur pranverën me fitore, dy ndeshje - dy fitore.