Prishtina triumfon ndaj Gjilanit

Prishtina ka shënuar fitoren e dytë me radhë në Superligë sot, duke e mposhtur Gjilanin në Rexhep Rexhepi të Drenasit, në një terren të rënduar, 2-1.

Kjo ka qenë humbja e dytë e Gjilanit këtë stinor, ndërsa edhe të parën e kishte humbur në Rexhep Rexhepi, që e bën këtë terren të padëshiruar për ekipin e Arbnor Morinës.

Ka qenë Gauthier Mankenda që ka hapur rezultatin sot në Drenas, kur qëlloi portën e Donat Kaçiut në minutën e 27 të ndeshjes për epërsinë 1-0.

TABELA AKTUALE

Ndërsa pak para fundit të pjesës së parë, Gjilani barazoi me golin e Gëzim Rusit, që pranoi një top nga reprezentuesi, Armend Thaqi.

Ekipet shkuan në pushim me barazim, 1-1, ndërsa në pjesë të dytë, bardhekaltërit kërkuan golin së pari me Ergyn Ahmetin, e nuk vonoi shumë, Debatik Curri me përvojë asistoi për Ahmed Januzin, që shënoi për epërsinë e radhës të Prishtinës, që doli të jetë rezultat i triumfit, 2-1.

Deri në fund të ndeshjes, Gjilani bëri edhe dy zëvendësime, pasi Morina futi në ndeshje Dior Zabërxhën dhe Besart Morinën, por ndërrim në rezultat nuk kishte dhe fitorja u mbeti vendasve që ruajnë pozitën e dytë në klasifikim dhe ndjekjen e liderit në 2 pikë.

Gjilani në anën tjetër, pas kësaj disfate mbetet në pozitën e shtatë të klasifikimit.