PSG eliminohet nga Kupa!

Paris St Germain i mbushur me miliona nga pronarët e rinj arab, ka pësuar edhe një goditje pas eliminimit nga Liga e Kampionëve. Me gjasë, ky eliminim është edhe më i dhimbshëm për parisienët, të cilët kanë mbetur të befasuar. 

Ata sonte nuk kanë arritur më shumë se një barazim në çerekfinale të Kupës së Francës, ndërsa pas penalltive janë eliminuar nga ekipi modest i Evianit, që lufton për ekzistencë në Ligue 1. 

Paris St Germain arriti të kalojë në epërsi pas golit të argjentiasit Javier Pastore në minutën e nëntë të takimit dhe gjithçka dukej se po shkonte sipas planit. Mirëpo, barazimi i arritur në fund të pjesës së parë nëpërmjet tunisianit, Saber Khalifa, ka dërguar ndeshjen në vazhdime, pasi që nuk kishte gola më. 

Kur edhe pas vazhdimeve nuk kishte gola, përveç kartonit të kuq të Thiago Mottas në minutën e 118-të, u desht që të ekzekutohen penalltitë për të përcaktuar gjysmëfinalistin e fundit në Coupe de France. 

Dy ish milanistët, Zlatan Ibrahimovic dhe Thiago Silva huqën penalltitë, derisa vetëm Ezequiel Lavezzi shënoi për ekipin e Carlo Ancelottit. E Eviani i shënoi të katër penalltitë për t’i lënë gojëhapur kryeqytetasit dhe kaloi në gjysmëfinale. 

COUPE DE FRANCE - ÇEREKFINALET