Qemal Stafa gati për Kukësin

Gjithçka pritet të jetë në nivel para ndeshjes së Kukësit ndaj Trabzonsporit në kuadër të Play-Offit të Europa League. Pasi që UEFA ka pranuar që ndeshja të luhet në stadiumin Qemal Stafa, kryesia e Kukësit për të mbushur stadiumin sa më shumë me përkrahës para kualifikimit për Europa League - nuk ka ndryshuar asgjë nga çmimi i biletave. 

Kështu tribunat D1, D2 dhe D3 do të kenë çmimin prej 500 lekëve për biletë, që i bie pak më shumë se 3 euro, ndërsa tribunat qëndrore, A dhe B, do të kenë çmimin 2 mijë lekë për biletë. 

Kukësi ka arritur të shkruajë histori në futbollin shqiptar duke kaluar tre xhiro kualifikuese në gara europiane - gjë që deri më sot nuk është arritur nga asnjë ekip shqiptar. 

Kukësianët e udhëhequr nga teknikui Armando Cungu, kanë eliminuar Flora Talin nga Estonia, pastaj Sarajevo nga Bosnja e Hercegovina dhe së fundi, Metalurh Donetsk nga Ukraina. 

Nëse djelmoshat e Cungut do të arrijnë të eliminojnë Trabzonsporin e Turqisë do të bëhet ekipi i parë shqiptar që arrin të kualifikohet plotësisht në njërën ndër garat më të mëdha europiane ndonjëherë. Ndeshja e parë luhet më 22 gusht në Qemal Stafa të Tiranës, ndërsa ajo e kthimit më 29 gusht në Avni Aker të Trabzonit.