Rikthimi i radhës në Premier Ligë!

Trajneri spanjoll Unai Emery pritet t’i rikthehet gjithashtu Premier Ligës, pas rikthimit të Antonio Contes aty sot, pasi që Tottenham zyrtarizoi trajnerin e ri.

Sipas mediave të ndryshme të huaja, Emery është duke u konsideruar lartë nga Newcastle United, që aktualisht është bërë ekipi më i pasur në botë me blerjen e fundit nga pronarët e rinj të skuadrës.

“Newcastle është në gjah për trajnerin e ri që prej largimit të Steve Bruce më 20 tetor 2021. Deri tash, sipas raporteve të mbledhura janë dy që po konsiderohen maksimalisht si zëvendëues të Bruce në detyrë: Unai Emery dhe Eddie Howe,” ka shkruar ndër të tjera Eurosport sot.

The Times ka raportuar gjithashtu se bisedimet me Emeryn janë në fazën finale dhe sipas gazetës ai do të jetë në bankën e skuadrës për ndeshjen e radhës që ekipi e luan ndaj Brightonit, të shtunën më 6 nëntor. Emery, trajner aktual i Villarrealit, nesër, 3 nëntor, feston 50-vjetorin e lindjes. Spanjolli që u bë i famshëm në Angli me theksin e tij të veçantë dhe me fjalën “Good ebening” gjatë konferencave për shtyp, është thënë të jetë i gatshëm për rikthim.