Rikthimi i sigurisë

Inter mposhti mbrëmë Livornon 2-0. Rezultati edhe pse duket bindës, ata që e kanë parë ndeshjen dhe që e pranojnë faktin si Mazzarri - thonë se Livorno ka bërë Interin të vuaj. 

“U kam thënë se do të jetë vështirë. Livorno na ka bërë të vështirë lojën. Nuk na lanë të marrim frymë. E pranoj, kemi luajtur më mirë ndaj Cagliarit dhe Torinos dhe kemi dalë me barazim, e mbrëmë më keq dhe kemi dalë fitues,” kanë qenë ndër të tjera fjalët e Mazzarrit pas ndeshjes, transmetojnë mediat italiane sot. 

“Mirëpo, kthimi i Javier Zanettit u ka dhënë vetëbesim të gjithëve në fushë. Ai i kthjelli të gjithë. U them të gjithë lojtarëve, mësoni nga kapiteni dhe kampioni i vërtetë. Ta bësh këtë çka bëri Zanetti në moshën 40 vjeçe gati është e pamundur,” ka shtuar trajneri i ‘neroazzurrëve’. 

Javier Zanetti, kapiteni legjendar i Interit, nuk është paraqitur qe 6 muaj për skuadrën e tij prej se e lëndoi thembrën. Mbrëmë, ai iu rikthye Interit, duke u futur në lojë në dhjetëminutëshin e fundit të takimit. 

Inter me fitoren e mbrëmshme ka arritur të mbetet në katërshen kryesuese të Serie A, pas 12 xhirove të para.