Rivalët e vjetër në Pejë, Drita ruajtjen e kreut në Gjilan

Me fillim nga ora 14:00, sot zhvillohen dy ndeshje të Superligës së Kosovës në futboll.

Dy rivalët e ‘moçëm’ të futbollit kosovar, Prishtina e Vëllaznimi, takohen në Pejë, në një duel mes skuadrave me ambicie krejtësisht të kundërta sa i përket ligës. Prishtina kërkon fitore për ta vazhduar luftën drejt kreut të klasifikimit, kurse Vëllaznimi tenton daljen nga zona e rrezikshme. Ky mund të mos jetë dueli i fundit sezonal mes këtyre dy skuadrave, pasi këto dy skuadra mund të takohen edhe në finale të Kupës së Kosovës, në rast se kalojnë fillimisht fazën gjysmëfinale.

TABELA AKTUALE SUPERLIGA

Takimi tjetër i ditës luhet në Gjilan, ku Drita, lidere aktuale e Superligës, e pret Flamurtarin e vendit të parafundit në tabelë. Një fitore e Dritës do ta mbante në krye skuadrën e Bekim Isufit pavarësisht rezultateve tjera, kurse Flamurtari tenton që të paktën të kalojë në zonën e barazhit.