Shembull e ke Messin

Pas shikimit të ndeshjes në video inçizim, David Moyes, ka dalë me deklaratë lidhur me goditjet dhe shqelmimet që i morri kosovari i Manchester Unitedit, Adnan Januzaj në ndeshje ndaj Fulhamit, pikërisht nga Sascha Riether. 

“Këto nuk i pashë gjatë ndeshjes. Ishim larg dhe ishte e pamundur të vërehen këto detaje. Mendoj se Adnanit i duhet mbrojtje nga gjyqtarët. Ai po shqelmohet kështu që ai meriton më shumë mbrojtje për atë që po jep në fushë,” ka thënë Moyes transmeton faqja zyrtare e Manchester United. 

Moyes mendon se modeli perfekt të cilin duhet ta ndjek Adnani është ylli i Barcelonës Lionel Messi, që ka marrë goditje të panumërta gjatë karrierës, por përkundër të gjithave ai ka gjetur fuqi për tu çuar në këmbë. 

“Kemi biseduar me Adnanin për këtë,” ka shtuar Moyes. “Ai po mëson nga profesionistët mënyrën se si duhet të pranojë këtë. Ai vetëm duhet të shikojë Messin, që është më i miri në botë, që po pranon goditje dhe vazhdon të prodhojë magji. Këtë sjellje e kërkojmë edhe nga Adnani.” 

“Nuk është kjo çështje e kërkimit të mbrojtjes, diku jashtë vijës, nëse ai nuk luan lojën që po e luan tani. Ai duhet të luajë lojën e tij më të mirë që mundet dhe çfarëdo që ndodh, ne asnjëherë nuk do ta kërkojmë atë - kjo varet nga referët,” ka përfunduar Moyes mendimin e tij pas rishikimit të ndeshjes me Fulhamin, shkruan sot faqja zyrtare e ‘djajve të kuq’.