Shkon Stimac, vjen Kovac

Katër ndeshjet e fundit kualifikuese për Kroacinë ishin të tmerrshme. Përveç që humbën luftën me Belgjikën për kreun e Grupit A të Eurozonës dhe kualifikim direkt, kroatët regjistruan tre humbje dhe një barazim në katër ndeshjet e fundit. 

E kjo ka bërë që sot kryetari i Federatës së Futbollit të Kroacisë, Davor Suker, të kumtojë para opinionit se shoku i tij, bashkëlojtari dhe deri sot përzgjedhësi i kombëtares, Igor Stimac, të shkarkohet nga detyra e tij. 

“Bordi ekzekutiv i HNS-së ka vendosur unanimisht t’ia terminojë kontratën Igor Stimacit dhe ta lirojë atë nga të gjitha detyrat në reprezentacion. Bordi, gjithashtu ka vendosur që në vend të tij të vjen Niko Kovac,” ka thënë Suker në konferencë për shtyp sot pasdite. 

Niko Kovac, që gjithashtu ka qenë ish bashkëlojtarë i Sukerit në reprezentacion ka treguar rezultate të jashtëzakonshme me përfaqësuesen U-21 të Kroacisë në kualifikime për EURO 2015, duke shëunar katër fitore në katër ndeshje me golaverazh 13-0! 

“Kovac do të ketë detyrë që të na dërgojë neve në Brazil dhe nëse e arrijmë këtë, atij do t’i vazhdohet kontrata duke i ofruar një afatgjate,” ka shtuar më tej kreu i HNS-së, Suker. 

Tani më ish përzgjedhësi Stimac kishte filluar shumë mirë kualifikimet për Brazil, me fitore ndaj rivalit më të madh të Kroacisë, Serbisë 2-0. Deri në pesë ndeshjet e fundit Kroacia ishte bashkëkryesuese e grupit me Belgjikën me 16 pikë. Mirëpo, e tëra e mori teposhtëzen kur Kroacia humbi si vendase nga Skocia, e prej atëherë kroatët nuk regjistruan asnjë fitore dhe vetëm falë një barazimi në muajt e fundit siguruan barazhin.