WESTFALEN

REUTERS/Ina Fassbender

S’ka favorit

24 April, 2013 @10:51

Kalimi senzacional i Borussia Dortmundit në gjysmëfinale të Ligës së Kampionëve, me dy gola të shënuara ndaj Malagës në minutat shtesë të ndeshjes në fitoren 3-2 - ka ngritur apetitet e gjermanëve.

Mirëpo, trajneri i tyre, Jurgen Klopp, para ndeshjes me Real Madridin është treguar i matur.

“Ne luajmë kundër ekipit më të madh në botë. Ne jemi të gatshëm dhe do të japim gjithçka nga vetja në këtë përballje,” është cituar të ketë thënë Klopp në konferencë për shtyp para ndeshjes nga mediat e huaja.

“Kur je në gjysmëfinale, natyrisht që mendon si të arrin në finale.”

Borussia Dortmund, që këtë stinor ia ‘lëshoi’ titullin Bayern Munchenit në Bundesligë, është takuar dy herë në fazën grupore me Real Madridin. Gjermanët kishin fituar ndeshjen e parë në Dortmund 2-1, ndërsa kishin dalë të pamposhtur nga Santiago Bernabeu, 2-2.

Singal Iduna Park (Westfalen) i Dortmundit ka qenë fortesë e pakalueshme në Ligën e Kampionëve deri më tani dhe gjermanët e presin edhe në ndeshjen e sontme një gjë të tillë.

Në anën tjetër, madrilenët duken të qetë. Në një mënyrë, ata janë në gjendje sikurse kundërshtari i tyre, pasi që titullin këtë herë ia ‘lëshuan’ rivalëve, Barcelonës.

Mirëpo, kjo i bën ata edhe më të rrezikshëm, pasi që oreksin e trajnerit, Jose Mourinho dhe yjeve të shumta në skuadër mund ta ngopë vetëm trofeu i Ligës së Kampionëve.

Real mposhti Galatasarayin në çerekfinale, ndësrsa mbrojtësi portugez i madrilenëve, Pepe, shpreson që mos t’i gjejë fati i stinorit të kaluar që të eliminohen në gjysmëfinale të Ligës së Kampionëve.

“Ndeshja e së mërkurës është tejet e rëndësishme për ne. Çdokush në skuadër është i vetëdijshëm për këtë,” ka thënë Pepe, një ditë para ndeshjes.

“Ne do të dalim në fushë për ta fituar ndeshjen. Shpresojmë që do ta kemi atë grimcë fati që na mungoi në gjysmëfinalen e stinorit të kaluar.”

Njëra ndër shtëpitë e mëdha të bastoreve botërore, William Hill, ka dhënë koeficient të njejtë si për gjermanët ashtu edhe për spanjollët, duke mos lënë favorit për këtë ndeshje. Edhepse në ndërkohë kuotat mund të lëvizin.