Sonte ndaj Eintrachtit

Përfaqësuesja e Kosovës do të zhvillojë miqësoren e parë për këtë vit sot, ndaj Eintracht Frankfurtit në Frankfurt të Gjermanisë. 

Ekipi i drejtuar nga Albert Bunjaku, është mbledhur dje në qytetin gjerman në fjalë dhe në mbrëmje ka zhvilluar stërvitjet e para dhe të plota para përballjes së sotme. 

Eintracht Frankfurtit pritet t’i mungojnë disa nga lojtarët më të mirë, të cilët janë pjesë e kombëtareve të ndryshme botërore (Makoto Hasebe, Takashi Inui, Marc Stendera, Timothy Chandler, Haris Seferovic, Emil Balayev dhe disa tjerë), mirëpo përballja pritet të jetë interesasnte. 

FTESAT E BUNJAKUT

Kosova debutoi në arenën ndërkombëtare pas marrjes së lejes nga FIFA për miqësore, më 5 mars të vitit të kaluar, kur kishte barazuar 0-0 me Haitin në ndeshjen historike. 

Që nga ajo kohë përfaqësuesja kosovare ka zhvilluar edhe 4 miqësore tjera, duke u mposhtur nga Turqia në Mitrovicë dhe nga Senegali në Zvicër. 

Më 7 shtator të vitit të kaluar Kosova regjistroi fitoren e parë duke e mposhtur Omanin 1-0 në Stadiumin e Prishtinës dhe pas saj mposhti edhe ekipin e ligës së dytë zvicerane Wil, gjithashtu 1-0.