Spurs ngrit ofertën për Vedatin

E përditshmja turke Aksham në numrin e sotëm ka bërë të ditur se Tottenham Hotspurs me çdo kusht dëshiron marrjen e Vedat Muriqit!

Fenerbahçe kishte refuzuar ofertën e parë të londinezëve, por këta të fundit pas lëndimit të Harry Kane‘it, thuhet të kenë ngritur ofertën për sulmuesin e Kosovës.

Aksham ka shkruar se Spurs që drejtohet nga Jose Mourinho do të ofrojë mbi 20 milionë funta për Muriqin, kurse në ndërkohë pritet të shihet reagimi nga klubi turk.

Njëjtë, Fenerbahçes i ka ardhur edhe lajmi nga arbitrazhi sportiv, se nuk mund të harxhojë më shumë se 2.5 milionë euro në afatin kalimtar të janarit dhe opsioni i vetëm i ekipit verdhekaltër për përforcime gjatë këtij muaji do të jetë shitja e 2-3 lojtarëve.

Më parë, ekipi nga Sukru Saraçoglu ka thënë se nuk vjen në konsiderim shitja e Muriqit, së paku deri në fund të këtij stinori, për shkak se ekipi me çdo kusht synon titullin kampion.

Fenerbahçe nuk ka fituar titullin kampion që prej vitit 2014 dhe tashmë po bëhen gjashtë vite të plota pa te.