TE GJILANI
Suspendohen Shabani e Eminhaziri
25 October, 2016 @13:27
Gjilanit do t’i mungojnë shumë në javët në vazhdim të Superligës, dy lojtarë standard të ekipit.
Kjo pasi që Komisioni Disciplinor (KD) i Federatës së Futbollit të Kosovës (FFK) ka suspenduar me 3 ndeshje moslojë Egzon Shabanin dhe 4 ndeshje moslojë sulmuesin e ekipit, Isa Eminhaziri.
Në Vendimin e KD-së për secilin shkruan:
Egzon Shabani, lojtar i KF Gjilani - sjellje josportive, reagime të pakontrolluara ndaj referit Tefik Maloku (shtyerje e fuqishme, që e rrëzon gjyqtarin në tokë, pas akordimit të penalltisë) sipas raportit të zyrtarëve të ndeshjes - dënohet me 3 ndeshje moslojë sipas radhës të organizuara nga FFK-ja.
Isa Eminhaziri, lojtar i KF Gjilani - sjellje josportive gjatë dhe pas përfundimit të ndeshjes Liria-Gjilani (fyerje, sharje, reagime të pakontrolluara në vendimet e gjyqtarit kryesor, si dhe i identifikuar si shkaktar kryesor i tensionimit të situatave gjatë rrjedhës së lojës dhe pas ndeshjes) - dënohet me 4 ndeshje moslojës sipas radhës të organizuara nga FFK-ja.
Palët e pakënaqura nga Vendimet e pranuara mund të ankohen në Komisionin për Aneksa të shkallës së dytë në afat prej 8 ditësh, ka bërë të ditur në fund KD i FFK-së.
