Trajneri i ri i Fushë Kosovës, debuton nesër

Vetëm një ditë pas dorëheqjes së Zylkifli Obërtincës si kryetrajner i Fushë Kosovës, klubi ka bërë të ditur se ka emëruar trajner të ri të skuadrës Burim Shalën.

E Shala, pritet që të debutojë si kryetrajner i ekipit të pampurëve të dielën, kur Fushë Kosova është mysafire e Kikës në stadiumin e qytetit të Kamenicës.

“Unanimisht ia besuam detyrën Burim Shalës. Si lojtar shumëvjeçar i klubit dhe karrierës së tij, të qenurit kapiten për disa vite, ia besuam Burimit drejtimin e ekipit, pas prezantimit të vizionit të tij,” ka shkruar njoftimi i KF Fushë Kosova dje.

Përndryshe, Fushë Kosova këtë stinor iu kthye Ligës së Parë, pasi që në stinorin e kaluar u bë kampione e Ligës së Dytë të Kosovës. E si pjesëmarrëse në Ligën e Parë Grupi B, Fushë Kosova në pjesën e parë të stinorit e ka përfunduar në pozitë të tetë të renditjes.

Pampurët nga nëntë xhirot e gjysmës së stinorit të Ligës së Parë Grupi B kanë marrë dy fitore, dy barazime dhe pesë humbje, duke tubuar tetë pikë në total, dy më shumë sesa Kika, që është e fundit në renditje dhe kundërshtar i radhës!