Uruguaji, zë trenin e fundit

Uruguaji bëhet kombëtarja e fundit që është kualifikuar për Kampionatin Botëror Brazili 2014. Ata mbrëmë kaluan pengesën e tyre aziatike, Jordania, edhe zyrtarisht pasi që në ndeshjen e parë kishin shënuar fitore 5-0 dhe ndeshja e mbrëmshme u luajt sa për sy e faqe. 

Kështu fqinji i parë i Brazilit, Uruguaji, tashmë ka mbyllur dyert tjera për Botëror dhe tashmë presin shortin për grupe që mbahet muajin që vjen. 

Jashtë lojës, atmosfera në ndeshje ishte tejet madhështore, pasi që uruguajanët kishin bërë gati para ndeshjes golin e Alcides Ghiggia në ekran të madh. 

Ghiggia ka shënuar golin e fitores në finalen e Kupës Botërore në vitin 1950 që u mbajt në Brazil. E Ghiggia tash 86 vjeçar, i vetmi ende në jetë nga ajo gjeneratë, ka qenë i pranishëm në stadium dhe pas ndeshjes ka thënë: 

“Në finalen e Maracanas kanë qenë vetëm 30 uruguajanë. Sot kam fatin që të festojë me gjithë këta njerëz dhe është tepër emocionuese për mua.” 

Në ndeshjen e parë të zhvilluar në Aman, Uruguaji mitraloi kundërshtarin me gola nga çdo anë duke e kryer punë një javë më parë. E në ndeshjen e mrëmshme, ata festonin shkuarjen në Brazil, me qëllim të fitojnë titullin e botës.