ARSENAL - FULHAM
Xhaka e nis me gol, Arsenali gjen fitoren
1 January, 2019 @17:47
Me ‘këmbë të mbarë’ e ka nisur vitin e ri skuadra e Arsenalit.
Në një nga derbit e Londrës, Arsenali e ka mposhtur me rezultat 4-1 skuadrën e Fulhamit, për t’iu rikthyer 3 pikëve pas dy ndeshjeve të kaluara pa fitore.
Golin e parë për Arsenalin në vitin e ri 2019 e shënoi Granit Xhaka në minutën e 25’ të takimit të sotëm, gol i cili i hapi rrugë skuadrës së Emery drejt fitores. Ky ishte goli i gjashtë i Xhakës në Premier League që nga ardhja e tij te Arsenali, ndërsa interesant është fakti që mesfushori në fjalë sot për herë të parë në Premier League shënoi me goditje brenda zonës së rreptësisë, pasi që të pesë golat e kaluara Xhaka i kishte shënuar me goditje jashtë zonës.
Përveç Xhakës, startues për Arsenalin sot ishte edhe Shkodran Mustafi, i cili luajti për gjithsej 45 minuta.
Kjo fitore bën që Arsenali t’i afrohet Chelseat të vendit të katërt, kurse Fulhami i Ranierit bën edhe një hap prapa në luftën për mbijetesë.
