Zhdrella i gatshëm për ndeshjen kundër Llapit

Skuadra e Feronikelit dhe ajo e Llapit do të dalin përballë njëra tjetrës këtë fundjavë, në kuadër të Kupës së Kosovës.

Njëri prej lojtarëve më të rëndësishëm te Feronikeli, Mentor Zhdrella, e ka komentuar këtë ndeshje, duke vlerësuar cilësinë e Llapit dhe duke thënë se skuadra e tij është e gatshme për këtë përballje.

“Dihet që është një ndeshje mjaft e vështirë, duke marr parasysh që përballë kemi një skuadër mjaft të fortë siç është Llapi, që është shpallur edhe nënkampion i vjeshtës. Ka lojtarë mjaft të rëndësishëm në ekip, por ne jemi përgatitur gjatë gjithë viti dhe këto përgatitje kanë shkuar mjaft mirë. Besoj që do ta japim maksimumin për të arritur një rezultat pozitiv.”

Ai, më tej foli edhe për fazën përgatitore për stinorin pranveror, të cilën Feronikeli e kaloi në Kosovë dhe në Turqi.

“Kemi punuar mjaft shumë gjatë fazës përgatitore. Jemi përgatitur shumë mirë, duke bërë një punë të përbashkët me shtabin teknik dhe gjithë të tjerët brenda klubit. Sa i përket ndeshjeve miqësore kemi pasur gjatë përgatitjeve në Antalya kundërshtarë mjaft të fortë, kështu që e kemi parë edhe nivelin se ku jemi përafërsisht me skuadrat e tjera europiane. Neve na mbetet në vazhdim t’i qasemi maksimalisht lojës për Kupë dhe jemi të përgatitur mjaft mirë edhe për tërë stinorin.”

Futbollisti në fjalë, për fund foli edhe për gjendjen e tij aktuale, me të cilën kishte probleme për shkak të lëndimit

“Kam pasur një lëndim të lehtë dhe trajneri nuk ka dashur të më rrezikonte gjatë atyre ndeshjeve miqësore. Tash jam i gatshëm dhe besoj se do t’i ndihmojë skuadrës,” përfundoi Zhdrella.

Ndeshja ndërmjet Feronikelit dhe Llapit luhet të shtunën më 18 shkurt.