5 derbi për vikend

Manchester Utd – Tottenham (e shtunë, ora 6e15)

Të dyjave iu nevojitet një titull për të shpëtuar sezonin. Më shumë do të ishte i mirëseardhur për Spurs, derisa më shumë i nevojitet United. Qysh? Spurs kanë një ekip që ende konsiderohet në rritje, në zhvillim, dhe ky është me gjasë sezoni i fundit që mund të shpëtojnë pa ndonjë titull vendor. Vitin e ardhshëm me kthim në stadiumin e ri-ndërtuar, me një bazë talentesh si Kane, Alli, e Eriksen, duhet të konkurrojnë për tituj jo vetëm katër pozitat e para.

Në anën tjetër United është një sezon pas Cityt – vetëm shihni mbrojtësit e krahut që nuk janë më të mirë se Sagna, Zabaleta, e Kolarov. Problemi i Pogbës dhe krejt lojtarëve të Raiolës me gjasë do të zhduket këtë verë, dhe vetëm atëherë mund të nisin një aventurë për të fituar në aspektin sportiv, jo vetëm ekonomik.

Por, sot për sot, duhet të jetë ndeshja më e bukur e vikendit.

Sevilla – Barcelona (e shtunë, ora 9e30)

Finalja e Kupës së Mbretit. Fitore e lehtë e Barcelonës. Në pjesën e parë. Kaq.

Lazio – Sampdoria (e diel, ora 3)

Që të dyja ekipet luftojnë për Evropë, por në fronte të ndryshme. Lazio do të shkoj në ndryshime rrënjësore këtë verë, edhe Liga e Kampionëve s’do të jetë aq e këndshme sa Liga e Evropës këtë vit. Ngjashëm edhe Europa League për Sampdorinë. Por, në Serie A, që të dyja ekipet kanë pasur sezon të shkëlqyeshëm. U ka munguar vazhdueshmëria e rezultateve, me të cilat, të dyja do të ishin duke luftuar për më shumë se që luftojnë këtë të diele.

Chelsea – Southampton (e diel, ora 4)

Sa zor është të jesh vazhdimisht në krye të Premier League, pa çerek milioni investime çdo verë së paku, po shihet tash me Chelsean. Ata që larguan Mourinhon në sezonin pas titullit, me gjasë po largojnë edhe Conten. Arsyetimi i tij është se nuk ka pasur transferimet që ka dashur. Si ‘rossoner’, më vjen mirë që nuk kemi shpenzuar 70 milion në Moratën. E di që kemi shpenzuar gjysmën në Kalinicin! Chelsea ka ekip më të mirë se pozita ku është, por problemet e Contes me Costan, me Moratan, me David Luizin e kanë bërë të veten, dhe po të ishte Mourinho në vend të tij, këto moti kohë do të ishin kryetituj të mediave.

Southamptoni duhet të mendoj për Championship.

Juventus – Napoli (e diel, ora 15n9)

Diçka jashtëzakonisht e mirë këtë vit në kampionatet kryesore evropiane ka qenë sigurimi i titullit në ndeshjet direkte me kundërshtarin kryesor. Matematikisht s’do të sigurojnë titullin torinezët, por do të mund ta bënin sikur mos të lëshonin pikë të panevojshme javëve të fundit. Së paku fitorja ndaj Napolit do të vulos edhe ligën e fundit në Top5shen evropiane, jo që ka qenë në dyshim titulli as këtë vit.