6 ndeshje pa gol, s’vjen fitorja e Lirisë

S’ka as sot fitore për Lirinë!

Për të gjashtën ndeshje me radhë, skuadra e Lirisë ka dështuar të shënojë të paktën një gol, për ta vazhduar kështu ecurinë e rezultateve negative dhe për ta rrezikuar edhe më tepër rënien nga elita e futbollit kosovar.

Sot prizrenasit u ndalën në barazim nga Ballkani, skuadër kjo që gjithashtu po lufton për mbetje në Superligë.

Në pjesën e parë që u mbyll pa gola, pak më e rrezikshme ishte skuadra mysafire, e cila rastin më të mirë në këtë pjesë e kishte pak pa përfunduar pjesa e dytë, kur Jetmir Topalli e goditi me kokë shtyllën, por për fat të mirë të vendasve topi nuk përfundoi në rrjetë.

Sa i përket vendasve, rast të mirë në pjesëlojën e parë shpërdoroi Memaj, i cili i shërbyer nga Liridon Fetahaj nuk arriti ta gjente rrjetën në minutën e 36’, ndërsa dy minuta më vonë, këmbëshpejti Fetahaj rrezikoi me të majtën pasi dribloi dy kundërshtarë, por gjuajtja e tij u prit nga portieri mysafir.

TABELA AKTUALE

Në pjesën e dytë, ishte skuadra e Lirisë që kishte më tepër posedim, kurse rrezikimet e mysafirëve vinin kryesisht përmes kundërsulmeve, mirëpo rrjetat mbeten të paprekura deri në fund dhe skuadrat u detyruan të pajtohen me rezultat të bardhë, 0-0.

Barazimi i sotëm bën që Liria të mbetet e parafundit në tabelë me 25 pikë, 6 më pak se pozita që dërgon në barazh, kurse Ballkani momentalisht ndodhet jashtë zonës së barazhit.

Xhiron e ardhshme, Liria i shkon Trepçës ‘89 në Mitrovicë, kurse Ballkani e pret në shtëpi Ferizajin.

FORMACIONET STARTUESE