Agjenti i Hysajt për Chelsean: Do ta shihni

Njëri ndër futbollistët më të vlerësuar të kombetares shqiptare, Elseid Hysaj, ka humbur vendin e startuesit te Napoli nën drejtimin e Carlo Ancelottit.

Shqiptari po kritikohet për shkak të lojës së tij tepër mbrojtëse, ndërsa trajneri italian i ekipit po kërkon që ai të orientohet edhe më shumë në sulm.

“Do të shohim, ndoshta do të ndodh,” ka thënë Mario Giuffredi, agjenti i Hysajt për Radio Kiss Kiss Napoli.

“Ka treg edhe për lojtarë jo të mirë... pasi që njerëzit po e konsiderojnë atë si jo të mirë për Napolin, ai ka gjasa të shkojë te Chelsea. E kjo ndoshta dikujt do t’i lë të kuptojë se nuk qenka edhe lojtar jo i mirë,” ka shtuar agjenti për Hysajn.

Hysaj kishte ardhur në Napoli bashkë me trajnerin e tij të dikurshëm Maurizio Sarri nga Empoli.

Gjatë periudhës sa Sarri drejtonte Napolin, Hysaj ka qenë i pazëvendësueshëm në krah të mbrojtjes.

Mirëpo, me largimin e Sarrit drejt Chelseat dhe ardhjen e Ancelottit në Napoli, gjërat kanë ndryshuar në terren për shkodranin.