Baftiu dhe Kuc vulosin, Ballkani fiton derbin dhe ruan lidershipin

Skuadra e Ballkanit të Suharekës ka treguar fuqinë e vetë sot, duke e mposhtur ndjekësin e parë të saj në luftë për titull kampioni, Dritën, 2-0 [Blendi Baftiu 78, Edvin Kuc 82].

Djelmoshat e drejtuar nga trajneri Ismet Munishi i kanë shkaktuar humbjen e parë Dritës në pjesën pranverore të stinorit. E bardhekaltërit e Ardian Nuhiut erdhën në Suharekë me tre fitore radhazi, për të ndërprerë serinë e fitoreve!

Rastet më të mira në pjesë të parë të ndeshjes i kanë pasur futbollisti i Dritës, Liridon Leci, që goditi shtyllën e Armend Ruxhit të Ballkanit, dhe Blendi Baftiu që goditi transverzalen e mysafirëve.

TABELA AKTUALE

Në anën tjetër, pas disa rasteve në fillim të pjesës së dytë, ndeshja u zgjidh në 12 minutat e fundit të saj. Baftiu dhe Kuc vendosën fituesin brenda 4 minutave me golat e tyre, derisa kthimi i Dritës në lojë ishte i pamundur në minutat e fundit.

Me këtë fitore Ballkani ngrit avantazhin në krye të tabelës ndaj Dritës në 4 pikë, duke pasur tash 44 pikë, 4 më shumë se gjilanasit.

Xhiron që vjen, Ballkani është mysafir i Flamurtarit që lufton për mbijetesë, ndërsa Drita pret Prishtinën në derbin e radhës.