Bayerni i pamëshirshëm, deklasohet Arsenali

Me rezultat të thellë 5-1 është mbyllur sfida mes Bayernit e Arsenalit në ‘Allianz Arena’. Skuadra e Ancelottit zhvilloi një paraqitje fantastike gjatë gjithë ndeshjes, ndërsa për t’u përmendur është periudha e minutave 50-65, periudhë në të cilën Bayerni shënoi plot 3 herë pas sulmeve të njëpasnjëshme drejt portës së londinezëve.

Goli i parë në pjesën e parë erdhi nga holandezi Robben me një të majtë tipike të stilit ‘Robben’, kurse Arsenali barazoi me kilianin Alexis Sanchez, i cili përkundër se gaboi nga pika e bardhë, shënoi nga topi i rikthyer pas herës së tretë.

Mund të thuhet që një nga pikat kyçe të takimit ishte lëndimi i francezit Koscielny në fillim të pjesës së dytë, largimi i të cilit ra në sy menjëherë, me dyshen Mustafi-Paulista që ishte totalisht jashtë çdo elementi. Mustafi e Paulista zhvilluan paraqitje tejet të dobëta dhe arsyeja që Bayerni sonte nuk shënoi më shumë se 5 herë është portieri Ospina, i cili befasoi të gjithë me paraqitje fenomenale përkundër 5 golave të pranuara, të cilat u pranuan pa fajin e tij. Përveç shumë mundësive për shënim, mund të thuhet që Bayernit iu mohuan edhe 2 penallti të pastërta nga gjyqtari kryesor, mirëpo as këto vendime nuk patën ndikim në rezultatin final.

Përveç Mustafit, startues në këtë takim ishte edhe Granit Xhaka, i cili u ndëshkua me karton të verdhë në pjesën e dytë.

Rezultati i arritur sonte nënkupton që bavarezët në Londër do të udhëtojnë vetëm për shëtitje, pasi që një rikthim i Arsenalit është shumë pak i mundshëm.

All Goals & Highlights HD - Bayern Munich 5-1… by kivancyildirim791