Bërbatovci e Namani çojnë Llapin në finale!

Me rezultat të thellë 4-1 është mbyllur ndeshja kthyese gjysmëfinale e Kupës së Kosovës mes Llapit e Drenicës, rezultat ky i cili bën që Llapi të kualifikohet për në finalen e Kupës, me ndeshjen e parë në Skenderaj që kishte përfunduar 0-0.

Serinë e golave për llapjanët e hapi Florim Bërbatovci, i cili qëlloi saktë nga afërsia pas pasimit fenomenal të Berat Hysenit. Gola të tjerë nuk pati dhe pjesa e parë u mbyll 1-0.

SKEMA KUPA E KOSOVËS

Me të filluar pjesa e dytë, epërsia e Llapit u dyfishua. Ishte kapiteni Hamdi Namani ai që shënoi me portën e zbrazët pas një akcioni të ndërtuar shkëlqyeshëm, për t’i dhënë kështu Llapit epërsinë 2-0. Në anën tjetër, Drenica e kërkoi golin pas golit të dytë të vendasve, mirëpo ngushtimi i epërsisë nuk erdhi. Përkundrazi, ishin llapjanët ata që shënuan edhe dy herë të tjera deri në fund të takimit përmes Bërbatovcit e Namanit, të cilët takimin e mbyllin me nga 2 gola secili. Kur ndeshja veçse ishte e mbyllur, Armend Abazi i mysafirëve e gjeti golin e nderit për skuadrën e tij, duke bërë kështu që epilogu final i takimit të jetë 4-1.

Në finale, Llapi kërkon dalje në garat evropiane në përballje ndaj Besës, e cila u kualifikua pasi mposhti me rezultat të thellë 6-0 skuadrën e Trepçës.