Bunjaki e konfirmon largimin: Janë 3 ndeshjet e fundit

Një ditë para ndeshjes me Finlandën, përzgjedhësi i Kosovës, Albert Bunjaki, ka mbajtur konferencën e zakonshme për shtyp, ku edhe e konfirmoi largimin e tij nga Përfaqësuesja pas 3 ndeshjeve të fundit eliminatore drejt Botërorit të Rusisë.

“Këto janë 3 ndeshjet e fundit për mua me Përfaqësuesen. Eliminatoret e Euro2020 nuk i nis unë. Kam punuar në një projekt ku shumica nuk besuan, ndërsa tash vendimi që e mora është personal”

Në lidhje me ndeshjen e nesërme, Bunjaki shtoi:

“Lojtarët që u aktivizuan me Kroacinë po bëjnë përgatitjet e fundit fizike për ndeshjen e nesërme. Ekziston lodhja në skuadër pasi që kishim vonesa gjatë rrugës.

Nëse ndonjëherë këta lojtarë kishin nevojë për përkrahje, atëherë momenti është ky. Finlanda nuk është aq e dobët sa po e bën publiku kosovar dhe do të jetë një ndeshje e vendosur nga detajet. Duam t’i dhurojmë popullit tonë maksimumin tonë në ndeshjen e nesërme, e cila është si një lloj finale për ne.

Jemi maksimalisht të përqëndruar dhe lëndime nuk kemi. Kololli e ka tejkaluar lëndimin dhe është në rregull. Duhet të mendojmë pozitivisht.”

Pikën e vetme në këto eliminatore Kosova e ka fituar pikërisht ndaj Finlandës, në takimin e luajtur shtatorin e kaluar në Turku.