Deri ku do të shkojnë?

Me futjen e garës në fazën finale, kanë nisur të ngritën edhe tensionet! Që të dyja ndeshjet e mbrëmjes ishin të acaruara, me vendime që ndonëse mund të duken kontroverse, ishin të drejta. Dhe të dyja ankesat ishin nga ekipet që u eliminuan, ndonëse ka shumë pak hapësirë për të arsyetuar ato ankesa.

CRISTIANO RONALDO

Rasti i parë ka të bëj me përjashtimin eventual të Cristianos. Mund të dëshmojnë nga VAR që qëllimi nuk ishte goditja në fytyrë e mbrojtësit iranian sa ishte tentimi për të fituar hapësirën për të udhëhequr topin.

Kartoni i verdhë është bërë zakon për të ‘arsyetuar’ vonesën në kohë, por është shumë më real se sa kartoni i kuq në atë rast.

IAGO ASPAS

Tek goli i Aspasit mund të arsyetohemi që vija tokësore dëshmonte që Aspas nuk ishte në pozitë jashtë loje.

Por, nëse shohim lëvizjen e pjesës së epërme të trupit, ai është në ofsajd, ndonëse shënon me pjesën trupore e cila ishte në pozitë të rregullt, kjo nuk arsyeton vendimin e gjyqtarit. Së paku jo ligjërisht.

KONSEKUENCAT E VENDIMEVE

Përjashtimi i Cristianos dhe eliminimi eventual i Spanjës, i cili s’do të ndodhte me humbjen prej një goli dhe barazimin e Iranit, do të bënin bujë më të madhe sot në mëngjes se sa vendimet e mbrëmshme. Përdorimi i VAR-it është për të ndihmuar gjyqtarin kryesor në vendimmarrje. Vendimi i fundit, qoftë edhe nëse VAR tregon diçka krejt tjetër, është barrë e gjyqtarit sipas rregullores së FIFA-s.

NDESHJET E ZHVILLUARA

Portugalia nuk po dëshmon formë kampioni. Por, ngjashëm ndodhte edhe në vitin 2016 kur fituan kampionatin evropian. As atëherë nuk kishte ekipe që dëshmonin formë kampioni. Mbrëmë ishin me fat, pasi iranianët u zgjuan vonë nga gjumi.

Irani rrëzoi vetveten duke u mbrojtur në 250 nga 270 minuta sa kanë luajtur në këtë Kupë Bote. Më shumë meritonte Maroku të kalonte grupin.

Marokenët mbrëmë gjetën fatin, por ishte shumë vonë. Kanë bërë ndoshta lojën më të bukur në këtë grup, por rezultati është ai që dërgon tutje. Fatkeqësisht në këtë rast. Merituan të largohen me fitore, e cila ishte afër ndonëse me ndryshime në formacionin bazë. E spanjollët do të këndellen tani kundër Rusisë, e cila nuk duket të jetë kundërshtare serioze pas humbjes së djeshme. Sidomos me Akinfeevin në portë.

Uruguait iu lejua të sulmojë nga larg, dhe siguroi epërsi e vendin e parë me mëritë në grupin A. Ndonëse në dy ndeshjet paraprake rusët ishin më të mirë, ndryshimet e tepërta dëmtuan shanset eventuale për fitore. Megjithatë, mendoj që si Portugalia ashtu edhe Spanja, nuk janë kundërshtarë të lehtë për asnjërën.

Arabët gjetën kurajë për të sulmuar, sikur ishin më të adaptuar me topin. Megjithatë, gabimet fillestare tek të dy ekipet tregojnë që këto dy vende duhet të kontribuojnë më shumë në cilësinë e ligave kombëtare e edhe zhvillimin e futbollit tek të rinjtë!

E SOTMJA SJELL…

Ngjashëm si Spanja, edhe Argjentina do të duhet të përbirohet nëpër vrimën e gjilpërës për të kaluar në rrethin e dytë. Do t’ia dalë dhe mund të shndërrohet në një tregim epik se ‘si Messi pa trajner fitoi Kupën e Botës!’. Kjo pasi islandezët nuk janë në formë mendore të mirë, e edhe ekipi i dytë i kroatëve është i rrezikshëm. Për atë, mendoj që më shumë gjasa ka të kaloj Nigeria, sesa Islanda në rrethin e dytë. Por, loja e hapur e nigerianëve është ajo çfarë i shkon për shtati Argjentinës!

Franca mund të kalkulonte sikur të luante më vonë, por s’dyshoj që me më qejf do të zgjidhnin Argjentinën se sa këtë Kroaci në rrethin e dytë. Prandaj, humbja karshi Danimarkës s’duhet të jetë në plan. Në ndeshjen tjetër, Australia duhet të fitojë, por nuk mund ta ketë lehtë kundër Perusë. Ekipet që nuk kanë asgjë për të humbur, nuk ‘lëshojnë’ ndeshjet në stilin ‘kosovar’. Pos nëse janë Panamaja!