Dueli për trofe dhe Europa Ligë

Me fillim prej orës 20:45 sonte në stadiumin Fadil Vokrri të Prishtinës, luhet finalja e Kupës së Kosovës në futboll, ku Feronikeli takohet me Trepçën’89.

Skuadra e Feronikelit javën e kaluar u bë kampion i Kosovës për herë të tretë në histori të klubit.

Në anën tjetër, Trepça’89 ka përfunduar stinorin e rregullt në zonën e barazhit dhe do të duhet të luajë ndeshje shtesë [ndaj Vëllaznimit] për të siguruar statusin elitar në futbollin e Kosovës.

TROFEU dhe GARAT EVROPIANE

Fituesi i Kupës përveç Kupës dhe të hollave që i merr nga sponzori, do të sigurojë një vend për kualifikime në Europa League këtë verë.

E Feronikeli, si kampion tashmë ka siguruar kualifikimet për Ligën e Kampionëve. Prandaj, ekipit të drejtuar nga Zekirija Ramadani ndeshja nuk do të ketë rëndësi në aspketin e kualifikimit për gara ndërkombëtare, por për trofe, histori dhe rritje sadopak të buxhetit.

Mitrovicasit e drejtuar nga Sabit Osmani, në rast të triumfit në Kupë do të sigurojnë për herë të dytë garat evropiane. Pas pjesëmarrjes në kualifikime për Ligë të Kampionëve, tash ‘89shi do të mund të shijojë edhe kualifikimet për Europa League - nëse fitojnë sonte.

Në rast të fitores së Feronikelit në Kupë, në kualifikime do të shkojë Prishtina, si nënkampione e Superligës.

RRUGËTIMI DREJT FINALES

Nga skuadrat finaliste nuk është raportuar të ketë mungesa. Sa i përket rrugëtimit deri në finale, Feronikeli në çerekfinale eliminoi Ferizajin 1-0. Golin e vetëm e pat shënuar golashënuesi më i mirë i sezonit 2018/19 Kastriot Rexha.

Ndërsa në gjysmëfinale Feronikeli me dy ndeshje kaloi Ballkanin e Suharekës për të arritur finalen.

Trepça’89 fitoi Prishtinën me penallti në çerekfinale të garës. Ndeshja në kohë të rregullt kishte përfunduar 0-0, kurse pas penalltive 5-4 në të mirë të mitrovicasve. Në gjysmëfinale ‘89shi kaloi lehtë Vëllaznimin e Gjakovës për të arritur finalen.

Feronikeli deri tash ka fituar dy herë Kupën e Kosovës. Në vitet 2014 dhe 2015. Kurse Trepça’89 një herë, 2012. Mitrovicasit kanë edhe një finale të humbur, ndaj Vëllaznimit në vitin 2008, 2-0.