Hajvalia nuk largohet nga garat

Pas shumë ankesave në lidhje me referimin në ndeshjen Hajvalia-Besa, paralajmërimit për largim nga gara, drejtuesit e Hajvalisë në mbledhjen e kryesisë të mbajtur sot kanë vendosur që të mbesin pjesë e Superligës dhe t’i përkrahin mbi 40 familje, personat e të cilëve marrin rrogë nga ky klub. 

“Ndoshta dikujt i konvenon që të tërhiqemi nga garat dhe lojtarët tanë të mbesin në rrugë, e 40 familje të mbesin pa të ardhura në këtë kohë krize. Por ne, si klub i falenderojmë donatorët tanë që pa përfitim mbështesin klubin dhe sigurojnë të ardhura për të gjithë personat që janë pjesë e ekipit,” ka njoftuar Hajvalia përmes faqes së saj zyrtare në Facebook për të vazhduar. 

“Sot u takuam edhe me zyrtarët e FFK-së nga të cilët kërkuam që të ndërmirren masa ndaj referëve që po dëmtojnë rëndë futbollin e Kosovës, e posaçërisht ndaj referëve që referuan të dielën ndeshjen Hajvalia-Besa. Pas takimit me krerët e FFK-së, kryesia e klubit ka vendosur që klubi të vazhdojë edhe më tutje garat në Superligë,” ka përfunduar kumtesa e ekipit të Hajvalisë. 

Hajvalia aktualisht është në vend të pestë të Superligës dhe ka 9 pikë më pak se Ferronikeli lider. 

Tabela aktuale e Superligës

Në xhiron e ardhshme Hajvalia luan derbin ndaj Prishtinës.