EFL CUP FINAL
Heroi Zlatan, United fiton Kupën
26 February, 2017 @19:33
Me triumfin e Manchester United është mbyllur finalja e Kupës së Ligës në Angli, që u zhvillua sot në ‘Wembley’ të Londrës.
Manchester United u përballë ndaj një super Southamptoni, që bëri çdo gjë për fitore, mirëpo në momentet vendimtare në skenë doli Zlatan Ibrahimovic, i cili shënoi me kokë dhe nuk lejoi që ndeshja të shkonte në vazhdime.
Në fakt, United kishte epërsi të dyfishtë me golat e Ibrahimovicit dhe Lingardit, ndërsa Southamptoni u kthye në lojë me 2 golat e Gabbiadinit në fund të pjesës së parë dhe në fillim të pjesës së dytë, për ta barazuar ndeshjen dhe për të shpresuar në triumf. Southamptoni pati edhe raste të tjera, mirëpo goli nuk erdhi në asnjë moment për ta, derisa në anën tjetër, United u tregua skuadër cinike dhe e mbylli takimin me fitore.
Ky është trofeu i 42 i klubit nga ‘Old Trafford’ nëse numërojmë vetëm trofetë kryesorë, ndërsa është i dyti për Jose Mourinhon me ‘Djajtë e Kuq’, pas atij të Superkupës në muajin gusht.
