I fokusuar te ekipet e mëdha

Granit Xhaka është zyrtarizuar si lojtar i ri i Arsenalit para pak çastesh dhe nuk ka vonuar shumë, ai ka bërë të njejtën në llogarinë e tij personale të Facebookut.

“Tashmë është zyrtare. Nga stinori i ardhshëm do të luaj për Arsenalin. Dua të falenderoj çdo kë te Borussia. Bashkë e sollëm ekipin aty ku e ka vendin, në Ligë të Kampionëve. Por, prej tash unë do të jem i fokusuar për të luajtur te njëri ndër ekipet më të mëdha në botë. është nder për mua të veshi fanellën e Arsenalit, sikurse që ka qenë nder të luaj për Gladbachun në 4 vitet e kaluara. Shpresoj të shihemi në Ligë të Kampionëve,” ka shkruar Graniti në njoftimin e tij të parë zyrtar prej se u bë lojtar i Arsenalit.

Granit Xhaka është aktualisht 23 vjeçar. Me origjinë nga Prishtina, ai është lindur e rritur në Basel të Zvicrës. Që prej vitit 2008, Graniti është pjesë e reprezentacioneve zinxhirore të Zvicrës duke nisur nga U-17. Sot është lider i kësaj përfaqësueseje në mesfushë.

Në vitin 2012 ai kaloi nga Baseli në Borussia Monchengladbach, ndërsa 4 vite më vonë bëhet shqiptari i radhës që arrin Premier Ligën dhe i pari që vesh fanellën e Topçinjëve nga Londra.