Ighalo çon Unitedin në çerekfinale të FA Kupës

Sulmuesi nigerian i Manchester Unitedit, Odion Ighalo, i ardhur në afatin kalimtar të janarit në Old Trafford, ka shënuar dy herë sonte në fitoren e ekipit të tij të ri 0-3 [Shaw 33, Ighalo 41, 70] ndaj Derby Countyt për t’i siguruar djajve të kuq çerekfinalen e Kupës FA.

Golin e parë të skuadrës së drejtuar nga norvegjezi Ole Gunnar Solskjaer e ka shënuar mbrojtësi Luke Shaw.

Me këtë fitore, Manchester United ka dalë në tetëshen më të mirë të Kupës së Anglisë, ndërsa në rrethin e radhës e pret Norwich City.

Vlen të ceket se për Derby Countyn prej minutës së parë të ndeshjes luajti legjenda e Manchester Unitedit, Wayne Rooney, që këtë vit iu kthye futbollit anglez nga SHBA-ja, duke nënshkruar për ekipin nga Championship.

Të gjithë futbollistët e Unitedit kërkuan që të takohen nga afër me ish-yllin e ekipit.

Ndeshja mes Norwich Cityt dhe Manchester Unitedit është shortuar të zhvillohet më 21 mars 2020 në Carrow Road.