PL ndalon shtrëngimin e duarve para loje

Elita e futbollit anglez, Premier League, ka bërë të ditur sot se ka ndaluar shtrëngimin e duarve që bëhet zakonisht para ndeshjeve të kësaj lige mes lojtarëve dhe mes gjyqtarëve të ndeshjeve.

Kjo gjë është e ndaluar deri në njoftimin e radhës për shkak të frikës nga përhapja e coronavirusit. Ky hap është ndërmarrë një ditë pasi që qeveria britanike ka kërkuar nga liga për të bërë hapat e para për mbrojtje nga ky virus.

Ekipet do të renditen si zakonisht dhe do të kalojnë pranë njëra-tjetrës, por lojtarët nuk do të kenë të drejtë të prekin dorën e njëri-tjetrit.

Mbi 90 mijë raste të këtij virusi janë regjistruar në 87 vende të ndryshme të botës, bën të ditur BBC.

Në javën e kaluar trajneri i Newcastle Unitedit, Steve Bruce, ka thënë se klubi që drejton ai ka ndalë ritualin e mëngjesit të shtrëngimit të duarve mes bashkëlojtarëve.

Ndërsa shefi i West Ham Unitedit, David Moyes, ka thënë se futbollistët e skuadrës së tij kanë filluar të “takohen” duke ia zgjatur grushtin njëri-tjetrin si masë mbrojtjeje.

Southampton ka ndaluar lojtarët e ekipit që të nënshkruajnë autografe për tifozë, ose të bëjnë ‘selfie’ me fansat e ekipit.