Japonia, gati për samba

Samurajët e kaltër kanë dominuar gjatë pjesës më të madhe të ndeshjes, por nuk kanë arritur që të ndalin golin e australianëve në minutën e 81-të të ndeshjes në Saitama. 

Mirëpo, japonezët kanë treguar karaketerin e tyre luftarak dhe jodorëzues duke provuar deri në minutën e fundit të ndeshjes - kur pas një penalltie ka shënuar Keisuke Honda në minutën e fundit të ndeshjes. 

Me këtë barazim, Japonia ka siguruar kualifikimin për Kampionat Botëror dhe pas vendasve do të jetë skuadra e parë që do të merr pjesë në Brazil 2014. 

Honda, i cili kishte arritur dje nga Moska, pas fitores së CSKA-së në finale të Kupës së Rusisë, është treguar edhe njëherë vendimtar për përfaqësuesen që udhëhiqet nga italiani karizmatik, Alberto Zaccheroni. 

Japonia, një xhiro pa përfunduar kualifikimet në Grupin B të Azisë dhe Oqeanisë, ka mbledhur 14 pikë nga shtatë ndeshje, derisa përcjellësit më të afërt të saj Omani (7 ndeshje, 9 pikë), Australia (6 ndeshje, 7 pikë) dhe Jordani (6 ndeshje, 7 pikë) do të luftojnë edhe për një vend të sigurtë në Brazil, ndërsa i treti luan në barazh.