Kampioni shpërthen në 10-minutëshin e fundit

Portugalia ka treguar fytyrë kampioni në përballjen hapëse për ta të EURO 2020, duke shpërthyer në 10-minutëshin e fundit ndaj Hungarisë, që sot luajti në Puskas Arena, për herë të parë përplotë me tifozë, mbi 60-mijë!

Përkundër sulmeve të shpeshta dhe mbajtjes së topit, hungarezët u treguan të durueshëm, luftarak dhe në disa raste tentues për të rrezikuar kampionin aktual të Evropës.

Bile, njëherë edhe shënuan në portën e Rui Patricios, por nga pozita jashtë loje. E i tërë mundi portugez u shpërblye në fund.

TABELA dhe ORARI

Ka qenë Raphael Guerreiro që goditi drejt portës, top që u devijua nga mbrojtja për ta befasuar për herë të parë portierin Peter Gulasci, që më parë kishte mbrojtur një torpedo të Bruno Fernandesit.

E pas kësaj gjithçka ishte më lehtë për Portugalinë.

Cristiano Ronaldo shënoi penalltinë e fituar për 0-2 dhe pas pak në një kombinim ultrasonik me Rafa Silvan mbylli perdet e teatrit Puskas me 0-3 [Guerreiro 84, Cristiano Ronaldo 87p, 90+2] përfundimtare dhe 3 pikë në grupin e vdekjes, Grupin F, ku pas pak takohen Franca-Gjermania.