GRUPI B: INTER - BARCELONA
Kuptohet e kualifikuara e parë
6 November, 2018 @22:53
Në një ndeshje të luajtur me mot me shi në qytetin e modës, Interi dhe Barcelona kanë barazuar me rezultat 1-1, rezultat i cili ia siguron Barcelonës kualifikimin në 1/8 e finales së Champions League, kjo për shkak të rezultateve më të mira në përballjet direkte me Interin, një prej 3 skuadrave që po luftojnë për kalim tutje.
Disa raste të mira u paraqitën për Luis Suarez në pjesën e parë, mirëpo rasti më i mirë këtë pjesë u shfaq për Asamoahn e vendasve, i cili gaboi nga shumë pak metra, duke bërë që skuadrat të shkonin në pushim me rezultat të bardhë.
E në pjesën e dytë, dominimi i katalanasve vazhdoi, e Interi në anën tjetër tentonte të rrezikonte përmes krosimeve nga krahët. Ishte zëvendësuesi Malcom ai që ia dha Barcelonës golin e epërsisë, mirëpo kur u mendua se takimi do të mbyllej me fitoren e mysafirëve, ishte i zakonshmi Icardi ai që e gjeti rrjetën për Interin dhe skuadrat u detyruan t’i ndajnë pikët.
Në ndeshjen tjetër të grupit, Tottenhami fitoi me përmbysje ndaj PSV-së 2-1, për të mbetur edhe më tutje në lojë për një kalim në fazën tjetër. Sa i përket Barcelonës, kjo skuadër bëhet e para që siguron 1/8 e finales në këtë edicion të Ligës së Kampionëve.
