Liverpool fenomenal, në finalen e radhës

Liverpool ka arritur të bëj rikthimin e madh në ndeshjen e kthimit të gjysmëfinales duke e mposhtur Barcelonën në Anfield Road 4-0.

Me këtë, djelomshat e Jurgen Klopp kanë shkrirë epërsinë e Barcelonës 3-0 nga Camp Nou, për të arritur finalen e dytë me radhë të Ligës së Kampionëve.

Dy momente kanë qenë vendimtare në fitoren e të kuqve në Anfieldin përplotë sonte, kur në fillim të pjesës së parë shënuan shpejt për të marrë hov me Divock Origin (7’) 1-0 si dhe e njëjta në pjesë të dytë me golat e shpejtë të Georginio Wijnaldumit 54’ dhe 56’ (për 2 dhe 3-0).

Shiko: SKEMA e CHAMPIONS

Barcelona përveç një super rasti të vonuar nga Lionel Messi kur rezultati ishte 1-0, nuk tregoi asgjë. Tërësisht e bllokuar dhe e habitur në lojë me energjinë e vendasve, ra pre e një dinakërie 10 minuta para fundit të ndeshjes, kur Alexander Arnold goditi befasishëm nga korneri për të gjetur Origin (79’) për 4-0 përfundimtare.

I tërë ekipi i Liverpoolit i bashkuar me You’ll Never Walk Alone këndoi deri në fund këngën me tifozët fantastik, që s’pushuan përgjatë gjithë ndeshjes dhe merituar arritën finalen e Ligës së Kampionëve.

E Barcelonës, që dikur ia kthente ekipeve tjera rezultatet bindëse në ndeshjet e kthimit, tashmë për dy stinorë radhazi po i hakmirret kjo. Stinorin e kaluar kështu i eliminoi Roma, e tash edhe Liverpooli.