Matthijs de Ligt, plotëson mozaikun e Juventusit

Panorama e mbrojtjes së Juventusit tashmë ka fituar edhe pjesën e fundit dhe kryesore të mozaikut.

Matthijs de Ligt është zyrtarisht lojtar i ri i Juventusit dhe ka nënshkruar kontratë deri më 30 qershor 2024 me ekipin kampion të Italisë. Kampion, që po kërkon titullin e nëntë me radhë dhe me ekipin tashmë të ndërtuar, s’pritet të ketë rival as në 2019/20 në Serie A.

Juventus ka bërë të ditur se marrëveshja është arritur me Ajaxin, ku kampioni aktual i Holandës përfiton 75 milionë euro, që do të paguhen në 5 vitet e ardhshme dhe 10 milionë tjera si bonuse të lidhura me lojtarin.

De Ligt që do t’i mbush të njëzetat më 12 gusht, u bë profesionist në stinorin 2016/17 dhe ka qenë pjesë e Ajaxit në 117 ndeshje në të gjitha garat.

Si mbrojtës, ai ka shënuar 13 gola prej të cilave 10 me kokë. Ai njihet si lojtar që mbizotëron perfekt topin, ndal sulmet kundërshtare dhe i fiton duelet një me një me sulmuesit rival.

“Benvenuto alla Juve, Matthijs!” ka shkruar në fund faqja zyrtare e Juventusit për futbollistin që e kërkonin katër ekipe të mëdha evropiane, dhe në fund ky vendosi për bianconerët.

The Guardian ka shkruar se rroga vjetore e De Ligtit do të jetë 16 milionë euro bazë, që me bonuse që varen nga performanca mund të shkojë deri në 24 milionë euro për sezon!

Në fund, paketimi De Ligt në total Juventusit do të mund t’i kushtojë 195 milionë euro, ku holandezi pritet të merr deri në 460 mijë euro rrogë javore, nëse i arrin krejt bonuset e parashkruara në kontratë.

Përndryshe, ai ka edhe klauzolën e lirimit të vendosur 150 milionë euro, por që ajo nuk mund të aktivizohet para qershorit të vitit 2022.

Para De Ligtit, Juventus ka marrë Luca Pellegrinin nga Roma për 20 milionë funta, Cristian Romeron nga Genoa për 23.3 milionë euro dhe Merih Demiralin nga Sassuolo për 16 milionë euro, derisa Adrien Rabiot, Gianluigi Buffon dhe Aaron Ramsey kanë ardhur pa dëmshpërblim.