Messi në formë, Barcelona shumë e fortë për Unitedin

Ashtu sikur takimi i luajtur në Angli, edhe takimi kthyes i zhvilluar sonte në Kataluni ka përfunduar me fitoren e Barcelonës.

Një ndeshje që filloi mirë për “Djajtë e Kuq”, me sulmuesin Rashford që goditi shtyllën pa kaluar as edhe një minutë lojë, u mbyll krejt ndryshe. Skuadra e Barcelonës nuk la shumë dilemë për fituesin, duke shënuar shpejt në minutat 16’ e 20’, për ta mbyllur ndeshjen.

Leo Messi, që ‘më në fund’ e gjeti rrjetën në çerekfinale të Ligës së Kampionëve, shënoi dy herë. Fillimisht, pas një topi të mbajtur ‘pashpjegimisht’ gjatë nga Ashley Young, Leo Messi shënoi në stilin e tij me të majtën nga pak-jashtë zonës, e më pas 4 minuta më vonë shënoi edhe një herë me ndihmën e David De Geas, gabimet e të cilit këtë sezon po vazhdojnë.

SKEMA E CHAMPIONS LEAGUES

Që nga shënimi i golit të dytë, çdo gjë sa i përket skuadrës që kalon tutje përfundoi. Loja kaloi totalisht në kontrollin e vendasve, të cilët të qetë e menaxhuan ndeshjen, madje edhe shënuan për rezultatin përfundimtar 3-0 me Coutinhon, i cili reagoi një supergol nga distanca.

Me Unitedin që i duhet të shpenzojë që të arrijë t’i bëjë ballë fuqive momentale të Evropës, Barcelona në anën tjetër sivjet e luan gjysmëfinalen e parë që nga viti 2015, ku me shumë gjasë do të ndeshet me Liverpoolin, skuadër kjo që ndeshjen kthyese nesër ndaj Portos e nis me një epërsi 2-0 nga përballja e parë në Angli.