ARSENAL - SPURS
Mustafi shënon, Arsenali fiton!
18 November, 2017 @15:22
Me fitoren e Arsenalit është mbyllur derbi i Londrës Veriore, derbi ky që e hapi xhiron e XII të Premier Leagues.
Fitorja e Arsenalit erdhi me 2 golat që u shënuan në pjesën e parë, ndërsa rol në këtë fitore pati edhe Shkodran Mustafi, i cili i rikthyer nga lëndimi zhvilloi një paraqitje tejet të mirë. Ishte Ozil ai që asistoi nga një gjuajtje e lirë e fituar në mënyrë tejet diskutabile, derisa Mustafi shënoi me kokë, gjithashtu nga një pozicion shumë ‘i dyshimtë’, që sipas përsëritjeve televizive krijoi diskutime nëse ishte apo jo jashtë loje.
Diskutimet për gjykimin e ndeshjes vazhduan edhe më tej, kur për 2-0 shënoi Alexis Sanchez, mirëpo sipas anësorit gjithçka ishte përsëri në rregull dhe me këtë rezultat u mbyll i gjithë takimi, duke bërë që Arsenali ta vazhdojë ngjitjen drejt pozitave të para të tabelës së klasifikimit.
Përveç Mustafit, startues si zakonisht për Arsenalin sot ishte edhe Granit Xhaka, i cili luajti për plot 90 minuta. Edhe Mustafi, edhe Xhaka, takimin e mbyllën të ndëshkuar me kartonë të verdhë.
