Në pritje të huliganëve

Policia spanjolle ka bërë të ditur sot se pret deri në 500 huliganë argjentinas të arrijnë në Madrid, para finales së ndeshjes së Copa Libertadores, që do të luhet të dielën.

River Plate dhe Boca Juniors do të luajnë finalen në Madrid, pas dhunës që shpërtheu në muajin e kaluar në Buenos Aires, që çoi në mos zhvillimin e ndeshjes.

“Janë 20 mijë bileta në shitje për secilin ekip, prej të cilave 10 mijë do të arrijnë nga Argjentina. Jemi në pritje të afërsisht 500 huliganëve nga Argjentina. Jemi duke punuar maksimalisht për t’i detektuar njerëzit me regjistra kriminal si në aeroport, ashtu edhe në qytet, në port etj.,” është cituar nga Marca të ketë thënë i deleguari i sigurisë për këtë ndeshje Jose Manuel Rodriguez Uribes.

Ndeshja e madhe zhvillohet në Santiago Bernabeu, të dielën më 9 dhjetor 2018, me fillim prej orës 20:30.