Pa Anel Rashkajn dhe Avni Pepën

Skuadra norvegjeze, Sandnes Ulf, ku luajnë dy futbollistë të ekipit përfaqësues të Kosovës, Anel Rashkaj dhe Avni Pepa, nuk do t’i lejojë këta të fundit të luajnë për Kosovën në dy ndeshjet e radhës kundër Turqisë dhe Senegalit.

Rashkaj dhe Pepa kanë marrë përgjigje negative nga skuadra e tyre, pasi që në datat kur do të luaj Kosova, do të ketë ndeshje edhe në kampionatin norvegjez. Gjithashtu si arsyetim është marrë edhe faza e vështirë që po kalon ky klub për shkak të krizës së rezultateve dhe lëndimeve të shumta të lojtarëve.

Qendërmbrojtësi kosovar, Avni Pepa, për të përditshmen kosovare, Arena, ka thënë se ai së bashku me Rashkajn dhe drejtuesit e klubit kanë pasur një takim të përbashkët të hënën, ku janë njoftuar se nuk do të mund të luajnë për Kosovën. Për këtë vendim dy futbollistët janë shprehur mjaftë të zhgënjyer.

Megjithatë, thuhet se ende ekziston një shpresë që klubi ta ndryshojë mendjen, edhe pse është shumë vështirë, ndërsa për këtë do të insistoj përzgjedhësi Albert Bunjaki i cili pritet të udhëtoj në Norvegji më 11 maj për të gjetur një gjuhë të përbashkët.

Në mënyrë të njëjtë sikurse Rashkaj dhe Pepa rrezikojnë të përfundojnë edhe futbollistët e tjerë të përfaqësueses së Kosovës që luajnë në Suedi si Shpëtim Hasani (Orebro), Loret Sadiku (Helsingborg) dhe Ardian Gashi (Helsingborg).