1/2: REAL - BAYERN
Reali përsëri në finale!
1 May, 2018 @22:43
Për të tretin vit me radhë, Real Madridi është finalist i Ligës së Kampionëve!
Madrilenët kualifikimin e arritën me shumë mund ndaj një Bayerni fantastik, i cili edhe sonte zhvilloi një paraqitje fantastike, mirëpo u ndëshkua nga gabimet individuale dhe u detyrua të pajtohet me eliminimin. Rafinha në ndeshjen e parë dhe portieri Ulreich sonte ishin disa nga “fajtorët” në këtë eliminim të Bayernit, mirëpo nuk duhet lënë pa u përmendur edhe paraqitja tejet solide e madrilenëve, të cilët në të dy ndeshjet e menaxhuan lojën dhe rezultatin me mjaft përvojë dhe u treguan cinikë në rastet që i patën.
Sa i përket golave, hero i madrilenëve sonte ishte Karim Benzema, mirëpo i shkëlqyeshëm u tregua edhe portieri Keylor Navas, i cili e mbajti skuadrën e tij në lojë me disa pritje fenomenale.
Në finalen e 26 majit në Kiev, Reali e pret fituesin e duelit mes Romës dhe Liverpoolit, duel në të cilin skuadra që kalon tutje do të konfirmohet nesër mbrëma.
